西貢勝記海鮮酒家 - 名不虛傳，米芝連級海鮮酒家 (下)

接 西貢勝記海鮮酒家 - 名不虛傳，米芝連級海鮮酒家 (上)

美食一路送上，刺激完舌頭之後，梗係俾佢休息一陣啦，黎一個粉絲清蒸貴花蚌。貴花蚌有半隻手掌大，清蒸保存左佢既鮮味，爽口又多汁，唔好以為粉絲淨係一個點綴呀，佢吸收左蚌汁味道，令到平平無奇既粉絲都變成主角。

一人一隻，唔好爭。

粉絲好好味，好配合呀。

上菜既時間預計得剛剛好，食完貴花蚌，令一個餸又到，就係炒蟶子皇呀。炒蟶子皇好多地方都係用豉椒炒，勝記都係。咪住，除好香既豉椒味，仲有另一陣香味。好奇心下，即刻問下伙計先，原來佢地除左用豉椒外，仲加入左九層塔呀，令到香味既層次更加豐富，上網搜尋過先知，唔係好多地方咁整呀。送飯一流。

配個白飯一齊食，一流呀

食左一陣，一陣濃郁既芝士飄過，伙計端上一個大碟。原來係另一位主角 - 龍蝦呀。今次揀左越南品種既龍蝦，體型較大。而今次就揀左芝士整，再加一個伊麵底。芝士汁好香濃，唔會水汪汪，伊麵吸左龍蝦既鮮味同濃郁既芝士，唔覺唔覺都食多幾啖麵呀。龍蝦爽口又彈牙，回味無窮呀。

汁又香又濃，伊麵好味

同事就叫左一條斤幾重班，我就對魚無咩特別要求既，而且條魚好新鮮，清蒸已經可以好好味，火候、時間控制得剛剛好，好好保存左魚既鮮又唔好鞋。

魚蒸得剛剛好，再配埋豉油，正呀

伙計又再端上一個砂鍋，掀開蓋子。噢~~，我差點忘了還點了桶蠔。我本身好鍾意食蠔，但係都明白不時不食既道理，但今次話要食 "豪" 啲，所以點都要一味蠔啦。因為我地真係好鍾意香口惹味既食物，所以今次個蠔就用左最基本既薑蔥整。雖然唔係食蠔既季節，但每隻蠔都好肥美呀。加上用砂鍋保溫，食既時候都仲係熱辣辣，唔小心呀，真係會 "辣" 親嘴呀。

雖然唔係食蠔既季節，但係啲蠔都脹卜卜呀

食到呢度，其實都已經有七成飽喇。咦，仲有野上既。原來同事仲點左一隻炸子雞同一碟通菜。呢次真係飽呀。

雖然酒家主打海鮮，但呢隻炸子雞，水準都好高呀

皮脆肉嫩呀

食咁多肉，食返啲菜，平衡下先

食到呢度，真係十分滿足呀。最後梗係送番個糕點，俾你平衡番下啦。你地估唔估到係咩呢?

少見有人整益力多糕，有啲心思下

除左杞子桂花糕外，原來另一隻係益力多糕呀。係比較少見既做法。又幾好味喎，而且唔會太甜。

當晚真係好開心，大家都好期待有下次既聚會呀。